• TotalTechnology
• 2021-08-29

Дэлхийн хамгийн том компьютер тоглоомын компаниудын нэг Electronic Arts (EA) кибер халдлагад өртөж, үнэтэй мэдээллээ хулгайд алдсан тухай өчигдөр зарлажээ.

Хакерууд тус компанийн FIFA 21 зэрэг хэд хэдэн тоглоомын эх кодыг хулгайлснаас гадна олон тоглоомын гол цөм болдог Frostbite “game engine”-ийг нь хулгайлсан байна.

EA компаниас нийтдээ 780GB хэмжээтэй үнэт мэдээллийг хакерууд хулгайлжээ. Гэхдээ хэрэглэгчийнхээ ямар ч нууц мэдээллийг алдаагүйг тус компани баталсан байна.

EA нь дэлхийн компьютер тоглоомын зах зээлд Battlefield, Star Wars: Jedi Fallen Order, The Sims, Titanfall зэрэг томоохон бүтээгдэхүүнүүдийг гаргаж байсан юм.

“Сүүлд манай компанийн дотоод сүлжээнд гарсан халдлагын улмаас тодорхой тооны тоглоомын эх кодууд, багаж хэрэгслүүд алдагдсаныг бид шалгаж эхлээд байна. Хэрэглэгчийн хувийн ямар ч мэдээлэл алдагдаагүй. Хэрэглэгчдэд ямар нэг эрсдэл үүсээгүй гэдэгт бид итгэлтэй байна” гэж EA компанийн мэдэгдэлд өгүүлжээ. EA халдлагын мөрөөд хуулийн байгууллагуудтай хамтран ажиллаж байгаа гэнэ.

Мөн энэ удаагийн халдлага тус компанийн бизнест сөрөг нөлөө үзүүлэхгүйг мэдэгдсэн байна.

Саяхан АНУ-ын компаниудад гарах болсон “ransomware” төрлийн мэдээлэл барьцаалж, мөнгө нэхдэг халдлага биш байсныг EA баталжээ.

Сүүлийн жилүүдэд компьютер тоглоомын үйлдвэрлэгчид кибер халдлагын хохирогч болох явдал нэмэгдэж байгаа.

Өнгөрсөн оны арваннэгдүгээр сард Street Fighter, Resident Evil тоглоомуудыг бүтээсэн Capcom компани 350,000 орчим хэрэглэгчийнхээ хувийн мэдээллийг хакеруудад барьцаалуулж байв.

Энэ оны хоёрдугаар сард Cyberpunk тоглоомыг бүтээсэн CD Projekt Red компани мөн хэд хэдэн бүтээгдэхүүнийхээ эх кодыг алдсаныг хакерууд онлайн орчинд үнэ хаялцуулан зарж байжээ.

Эх сурвалж: BBC

• TotalTechnology
• 2021-08-29

Windows үйлдлийн системд нь ноцтой аюул учруулах “цоорхой” гарсантай холбоотой программaa яаралтай шинэчлэхийг Майкрософт компани өөрийн хэрэглэгчдэд анхааруулжээ.

“PrintNightmare” нэртэй уг цоорхой нь Windows Print Spooler үйлчилгээнд илэрсэн бөгөөд хакерууд үүнийг ашиглан компьютерт бүрэн эрхтэйгээр нэвтрэн программ суулгах, мэдээлэл устгах, шинэ хэрэглэгч үүсгэх зэргээр хохирол учруулж болох гэнэ.

Windows 10 системээс гадна хуучин Windows 7 системд ийм цоорхой гарсан байна.

Хэдийгээр Майкрософт Windows 7 системийн хөгжүүлэлт, шинэчлэлтийг өнгөрсөн оноос эхлэн зогсоосон ч “PrintNightmare” цоорхойд зориулж программын шинэчлэл гаргаснаас харвал ямар аюул тулгарсан нь тодорхой байна.

Үүнээс гадна Windows Server 2016, Windows Server 2012 системүүдэд зориулсан шинэчлэлтийг ойрын үед гаргахаар болжээ.

Харин шинэ үйлдлийн систем Windows 11 нь энэ удаагийн аюулд нэрвэгдээгүй байна. Энэхүү системийг зах зээлд албан ёсоор гаргаагүй, одоогоор зөвхөн хөгжүүлэгчид туршилтын хувилбарыг нь хэрэглэж байгаа юм.

Зургаан жилийн өмнө зах зээлд нэвтэрсэн Windows 10 систем дэлхий даяар 1.3 тэрбум орчим компьютер дээр ажилладаг байна.

Эх сурвалж: CNN

• TotalTechnology
• 2021-08-29

Ирэх долоо хоногоос YouTube компани богино видео бүтээгчдийг урамшуулах “Shorts Fund” нэртэй $100 саяын хөтөлбөрөө эхлүүлэхээр болжээ.

Тус компани ТикТок сошиал платформтой өрсөлдөх зорилгоор Shorts нэртэй богино хэмжээний видео түгээх үйлчилгээгээ энэ онд нэвтрүүлсэн юм.

Шинэ үйлчилгээнийхээ хүрээг тэлэхийн тулд сар бүр хамгийн олон үзэгчтэй видео бүтээсэн хэрэглэгчдийг $100-аас $10,000 хүртэл мөнгөн шагналаар урамшуулах болжээ.

Хэрвээ урамшуулал авах шаардлагыг хангасан бол тухайн хэрэглэгчийн YouTube аппликэйшнд хэр хэмжээний мөнгө авахаар болсон, яаж авах зэргийг мэдээлэх юм байна.

Шалгарсан хэрэглэгч тухайн сарынхаа 25-ны дотор мөнгөө авахгүй бол цуцлагдах ажээ.

Мэдээж видео бүтээгчид нь бусдын контентыг хуулбарлаагүй байх, зохиогчийн эрх зөрчөөгүй байх, видео нь гуравдагч этгээдийн лого, тэмдэггүй байх зэрэг шаардлага тавигдах гэнэ.

Мөн 13-аас дээш настай байх, АНУ, Их Британи зэрэг Shorts үйлчилгээ албан ёсоор нэвтэрсэн орны иргэд байх ёстой ажээ.

Shorts үйлчилгээг YouTube аппликэйшний Shorts товчноос олж хэрэглэх боломжтой. Ажиллагаа нь ТикТок үйлчилгээтэй тун төстэй юм байна. Анх энэ оны нэгдүгээр сард АНУ-ын зах зээлд нэвтэрч байсан Shorts үйлчилгээний хэрэглэгчийн тоо өнгөрсөн хагас жилийн хугацаанд 514 хувиар, видео сан нь 169 хувиар өссөн тухай YouTube компани мэдээлжээ.

Эх сурвалж: Tech Insider

Powered by Froala Editor

• TotalTechnology
• 2021-08-29

Хиймэл оюун хүнийг нүүр царай, хурууны хээгээр бус гарын судсаар нь таньдаг болоход суралцаж байгаа талаар Австралийн Шинэ Өмнөд Уэлсийн их сургуулийн эрдэмтэд хэллээ.

Хүнийг биометрийн аргаар таних нь орчин үеийн хамгийн өргөн хэрэглээтэй технологи болсон бөгөөд нүүр царай, дуу хоолой, хурууны хээ таних аргууд салбар бүрт ашиглагдаж байна. 

Гэвч эдгээр аргууд нь зарим талаар сул талтайг судлаачид анхаарууллаа. Жишээ нь хурууны хээг аливаа гадаргуугаас хуулж авч болдог, дуу хоолойг хураан авч ашиглаж болно, нүүр царайг дүрс ашиглан орлуулж, нүдний торлог бүрхэвч таних төхөөрөмжийг линз ашиглан хуурч болдог гэж Шинэ Өмнөд Уэлсийн их сургуулийн Компьютерын шинжлэх ухаан инженерийн сургуулийн судлаач Саид Шах хэлсэн байна.

Түүний хэлснээр гарын судас нь хурууны хээ шиг мөр үлдээдэггүй, нүүр царай шиг дүрс ашиглан орлуулж болдоггүй ба линз шиг дуурайлган хийхэд маш хэцүү аж.

Судалгаагаар 35 хүнийг хооронд нь гар бариулж 3D камераар 17500 зураг авсан бөгөөд хиймэл оюун тэр дундаас оролцогч тус бүрийн гарыг 99 хувьтай таньсан байна.

Эх сурвалж: gogo.mn